Имигрантите кои со мали бродови од Франција ќе се обидат да го минат каналот Ла Манш ќе бидат сместувани во центар за азил во Албанија, според новиот договор, пишува британскиот весник The Sun, а пренесува албански Top Channel.
Илегалните мигранти ќе летаат 1.500 километри до центарот за азил кој ќе биде изграден на море на Балканот, додека се разгледуваат нивните апликации.
Британскиот министер за внатрешни работи Прити Пател се надева дека ова ќе ги одврати имигрантите кои планираат да го направат опасното преминување преку каналот.
Таа додава дека „владите треба да бидат способни да ја разгледаат секоја можност кога станува збор за барателите на азил“.
Според The Sun, официјалните претставници во Лондон и Тирана потврдиле дека се блиску до постигнување договор за центарот.
„Шефот на кабинетот на премиерот Борис Џонсон, Ден Розенфилд, е клучен двигател на политиката, а дипломатите од Министерството за надворешни работи помагаат во тоа. Секретарката за внатрешни работи јасно стави до знаење дека сака ова да се случи. Преговорите, според неа, се во техничка фаза. Сега се прецизираат деталите, како што се точната локација и капацитетот“, пишува The Sun.
Се додава дека формирањето ваков центар во странство било дел од новиот предлог-закон за националност и граници.
