Од утре и приватниот превозник „Слобода превоз“ нема да вози бидејќи Град Скопје и ЈСП „Скопје“ не им плаќаат и им должат околу еден милион евра.
Од приватниот превозник велат дека со месеци не им се исплаќаат пари и не се почитува динамиката договорена на последниот состанок.
Автобуси нема да има на градските линии 9, 12, 22, 23 и 45. Засега ќе се пуштат возила само за приградските населби бидејќи таму ЈСП нема автобуси, па ако и тие ги укинат овие граѓани ќе бидат целосно отсечени од градот, пренесе СДК.мк.
Откако не падна договор, превозниците преку тужба за директорот на ЈСП ќе го решаваат проблемот.
На 20 октомври Скопје за првпат во историјата остана без јавен превоз, не возеа автобусите на ЈСП „Скопје“ бидејќи вработените немаа земено плата еден месец.
На 8 ноември градоначалничката на Скопје, Данела Арсовска го раскина договорот со приватниот превозник „Макекспрес“, кој престана да вози бидејќи Градот му должи половина милион евра.
„Можеби на некој тоа и му е намерата, да престанеме да возиме и како што направија со ‘Макекспрес‘ и со нас да го раскинат договорот. Но, потоа скопјани ќе останат без јавен превоз оти ЈСП немаат плус 200 автобуси за да ги заменат сите линии на кои возиме ние приватниците“, вели Ленин Јовановски од превозникот „Слобода превоз“.
Јовановски изјави дека доколку не се оствари средба со претставници на Град Скопје и градското претпријатие ќе има протести, а ако и натаму нема резултат, приватните превозници најавуваат штрајк.
„Во опција е и поднесување претставка до Антикорупциската комисија, а можеби и тужба на адреса на директорот на ЈСП за злоупотреба на службена должност, затоа што парите наменети за нас се пренасочуваат на друга страна“, изјави Јовановски.
