Пред почетокот на синоќешното полуфинале во шпанскиот Суперкуп публиката свиркаше за време на минутата молчење во чест на великанот Франц Бекенбауер.
Реал Мадрид и Атлетико синоќа одиграа одличен натпревар во полуфиналето од Суперкупот на Шпанија, кој и годинава се игра во Саудиска Арабија, а причината е добро позната - пари.
Но, пред почетокот се случи скандал откако 25-илјадната публиката очигледно не беше расположена да ја испочитува минутата молк во чест на големиот Франц Бекенбауер, кој почина во неделата.
Саудиските навивачи со свирежи ѝ оддадоа „чест“ на баварската легенда на неверување на играчите на двете екипи, кои нервозно подгледнуваа кон трибините.
Шпанија по четврти пат во последните пет години го одржува Суперкупот во оваа блискоисточна земја, а само во постпандемската 2021 поради рестрикциите го одржа дома. И овој пат се игра со 4 екипи, со две полуфиналиња, па финале.
Синоќа Реал Мадрид славеше со 5:3 по продолженија откако регуларните 90 минути завршија со возбудливи 3:3.
Бранител на пехарот е Барселона, која вечерва против Осасуна го игра второ полуфинале.
Финалето е закажано за в недела од 20 часот на стадионот „Кинг Сауд Јуниверзити“, каде се играат сите натпревари.
