Цените на нафтата паднаа вчера на меѓународните пазари по добивките во претходните два трговски дена, под притисок на неизвесните светски економски перспективи и посилниот долар.
Цената на барел сурова нафта падна на лондонскиот пазар во пладневната трговија во однос на претходното затворање од 70 центи, на 82,03 долари. На американскиот пазар барелот се тргуваше по пониска цена за 65 центи, од 78,11 долари. Вчера цените на двата пазара забележаа добивки над еден процент при затворањето.
Посилниот долар ја прави нафтата поскапа за имателите на други валути и обично го одразува намалениот апетит на инвеститорите за ризик.
„Закрепнувањето на доларот го намалува расположението. Се сомневам дека претстојното објавување на макроекономските податоци за цените на становите во САД и довербата на потрошувачите, исто така, ги држи купувачите на страна“, рече Стивен Бренок од PVM.
„Општиот апетит за ризични средства се намалува денес и гледаме загуби на повеќето пазари на суровини“, рече Оле Хансен од Saxo Bank.
Поддршка за цените на нафтата во утринската трговија беше дадена од оптимизмот на инвеститорите дека патувањето за одмор во Кина ќе ја зголеми побарувачката за гориво и очекувањата за минатонеделниот пад на залихите на сурова нафта во САД.
Неволните и планираните намалувања на снабдувањето обезбедуваат и поддршка за цените на нафтата. Извозот на нафта од северен Ирак веројатно нема да продолжи наскоро по едномесечното затворање, при што групата производители на ОПЕК + (составена од членки на Организацијата на земјите извознички на нафта и нивните партнери, вклучително и Русија) започна доброволни намалувања во мај.
Сепак, инвеститорите се чуваат на стража поради потенцијалното натамошно зголемување на каматните стапки од страна на централните банки, во САД, Велика Британија и Европската Унија, кои сакаат да ја ограничат инфлацијата, која го забавува економскиот раст и ја намалува побарувачката за енергија.
ФЕД, Банката на Англија и Европската централна банка се очекува да ги зголемат каматните стапки на нивните следни состаноци. ФЕД се состанува на 2 и 3 мај.
Трговците вчера го чекаа објавувањето на податоците од индустриската групација на Американскиот институт за нафта за состојбата на залихите во САД. Во истражувањето на Ројтерс, аналитичарите изразија очекување за минатонеделниот пад на залихите на сурова нафта за околу 1,7 милиони барели.
ОПЕК вчера објави дека цената на барел кошничка нафта на нејзините членки во понеделникот пораснала за 44 центи на 82,3 долари.
