Над 1.000 летови на германската авиокомпанија Lufthansa денеска беа откажани поради еднодневниот штрајк на персоналот на аеродромите ширум Германија.
Околу 134.000 патници мораа да ги променат плановите за патување или целосно да ги откажат летовите.
Најмалку 47 поврзувачки летови синоќа беа откажани, јави DPA. Најпогодени се главните центри на Lufthansa во Франкфурт и Минхен, но откажани се летови и во Диселдорф, Хамбург, Берлин, Бремен, Ханофер, Штутгарт и Келн.
Авиокомпанијата испрати и соопштение во кое ги советуваше патниците воопшто да не доаѓаат на аеродромите, бидејќи повеќето шалтери нема да работат.
Синдикатот вчера го најави штрајкот во обид да го зголеми притисокот врз Lufthansa во преговорите за зголемување на платите на околу 20.000 аеродромски работници.
Авиосообраќајот во Европа веќе извесно време е во колапс поради зголемениот број патници и недостигот на персонал на аеродромите.
