Во африканската држава Габон научници открија седум нови видови на коронавирус, но сè уште не е познато дали можат да преминат на човек и да предизвикаат нова пандемија, пишува New Scientist.
На научниците од претходно веќе им е познато дека коронавирусите може да преминат од лилјак на луѓе и да предизвикаат сериозни болести како што беше епидемијата на SARS во 2002/2003 година и пандемијата на COVID-19. За двете болести се смета дека се настанати откако коронавирусот од лилјак и веројатно преку посредник преминал на човечката популација.
Повеќето досега идентификувани видови на коронавирус кај лилјаци се пронајдени кај азиските видови, но сè повеќе од нив се откриваат и кај африканските лилјаци.
Гаел Маганга од Меѓународниот центар за медицински истражувања Franceville во Габон и неговите колеги неодамна тестирале повеќе од 1.000 лилјаци кои живеат во пештерите низ земјата и откриле дека 18 од нив имаат коронавирус.
Со генетско секвенцирање е утврдено дека станува збор за 7 нови коронавируси пронајдени кај лилјаци кои јадат инсекти. Пет од седумте нови вируси тесно се поврзани со познат коронавирус наречен хуман коронавирус 229E кој кружи меѓу луѓето од 60-тите години на минатиот век кога и е идентификуван, а кој обично предизвикува само благи симптоми на настинка.
Експертите затоа претпоставуваат дека новите видови исто така би можеле да преминат на луѓето и да предизвикаат благи симптоми или дури и сериозна болест, но потребни се дополнителни истражувања за тоа да се потврди.
