Новите податоци сугерираат на околу една третина од пациентите кои преживеале COVID-19, по болеста се борат со симптоми на посттрауматско стресно нарушување (ПТСН). Некои пациенти пријавиле дека се бореле и со анксиозност и кошмари по боледувањето.
ПТСН може да се појави кај луѓе кога симптомите на психолошка траума го нарушуваат секојдневното функционирање и траат повеќе од еден месец.
Според една италијанска студија објавена во списанието JAMA Psychiatry, дури една третина од луѓето кои преживеале COVID-19 исто така може да имаат ПТСН. Студијата опфатила 381 пациент, а резултатите сугерираат дека жените може да бидат повеќе склони кон ПТСН.
Резултатите покажале дека 115 лица или 30% имале ПТСН. Некои други дијагнози, како што се епизоди на депресија (17% од испитаниците), анксиозно растројство (7%) и психотично нарушување (0,2%), исто така, биле пријавени кај некои субјекти.
Оваа студија е во согласност со другите студии кои ги проучувале невролошките последици од COVID-19. Досегашните студии покажаа дека некои пациенти можно е да се борат со кошмари и анксиозност со месеци по болеста.
„Ова е загрижувачко“, изјави за CTV News д-р Делфина Јанири, психијатар од Универзитетската болница Гемели и главен автор на студијата.
Со оглед на тоа што пандемијата на коронавирус сè уште трае, заздравувањето дополнително се отежнува. Лекарите откриле дека ако не се лекува, ПТСН по COVID-19 може да доведе до депресија, анксиозност и злоупотреба на супстанции во обид да се справат со симптомите.
Истражувачите кои ја спроведоа гореспоменатата италијанска студија наведуваат дека ограничувањето на студијата е мал примерок, но дополнителни пообемни студии може да откријат повеќе информации што би помогнале во превенција и третман на овие дијагнози.
