Очекувано, предводникот на последнопласираниот Шефилд Јунајтед е првиот тренер кој заработи отказ сезонава на Островот.
Пол Хекингботом си ги пакува куферите од Шефилд и од денеска е невработен. Тој е првиот тренер што сезонава заработи отказ во англиската Премиер лига.
Шефилд Јунајтед до саботата беше претпоследен, но гостувањето кај во моментот последнопласираниот Барнли резултираше со петарда од 5:0, по што падна на најнепосакуваната позиција.
Тимот кој лани беше втор во Чемпионшип ита кон екпресно враќање во англиската втора лига и по 14 кола има скор од само 1 победа, 2 нерешени и дури 11 порази, со -28 гол-разлика (11:39).
Поразот од 5:0 од директниот конкурент за опстанок, Барнли, патем лани шампион во Чемпионшип, не е ниту највисокиот сеознава за тимот од „Брамал Лејн“. Во септември загуби 8:0 од Њукасл, а петарда прими и од Арсенал во октомври.
Единствената победа избраниците на 46-годишниот Хекингботом ја забележаа на почетокот од ноември кога Вулверхемптон загуби 2:1 во Шефилд. Следуваше реми 1:1 со Брајтон на гости, а еден месец претходно тимот го освои првиот бод сезонава играјќи 2:2 дома со Евертон.
Згора на тоа Шефилд Јунајтед испадна и од Лига купот губејќи на пенали од третолигашот Линколн на свој терен.
Хекингботом го водеше младинскиот тим на Шефилд Јунајтед кога во март 2021 стана в.д. тренер по отказот на Крис Вилдер. Тимот беше закован на дното од Премиер лигата и испадна, а потоа управата го ангажираше српскиот стратег Славиша Јокановиќ. Операцијата експресно враќање во елитата Србинот ја почна лошо, па доби отказ во ноември и тогаш Хекингботом ја доби довербата. Наредната сезона го водеше тимот со успех и го врати во англиската елита.