Поради наездата на позитивни во таборот на Џеноа, Лега Калчо го одложи саботниот дуел од 3. коло на Серија А против Торино.
Горан Пандев одморен ќе може да ѝ се стави на располагање на репрезентацијата откако Лега Калчо го одложи натпреварот на неговиот клуб.
Иако правилото на УЕФА вели дека клубот кој има позтивни мора како знае и умее да се снајде и да собере 13 негативни фудбалери, од кое барем 1 голман, сепак Лега Калчо направи исклучок. Натпреварот помеѓу Џеноа и Торино закажан за в сабота од 18 часот нема да се игра и за него дополнително ќе се бара термин.
Бидејќи во клубот од Џенова има 11 заразени играчи, Лега Калчо одлучи и да внесе ново подправило на она од УЕФА. Кога во еден клуб ќе има 10 или повеќе позитивни фудбалери, ќе биде ослободен од обврската да се снаоѓа и да игра по секоја цена, но само при првиот таков случај. Тоа значи дека Џеноа веќе го искористува овој џокер. Доколку уште еднаш настане ваков голем кластер, тимот на Пандев ќе мора да состави тим како знае и умее или ќе го загуби натпреварот со службени 3:0.
Одложувањето можеби и добро ќе му дојде на Пандев. Со куп позитивно тој секако ќе играѓше против Торино, можеби и цели 90 минути. Вака, одморен ќе дојде за баражот против Косово на 8 месецов, а наредниот клупски предизвик му е дури на 19-ти и тоа кај Верона на гости.