Папата Франциск денеска прогласи 10 лица за светци, меѓу кои еден холандски свештеник, борец против нацизмот, убиен во концентрациониот логор Дахау и францускиот монах пустиник убиен во Алжир.
Папата (85) беше донесен до олтарот во инвалидска количка поради болки во колената и нозете. На плоштадот Свети Петар имаше повеќе од 50.000 луѓе, што е еден од најголемите собири по ублажувањето на рестриктивните мерки воведени поради ковид пандемијата.
Тој ги прочита имињата на канонизираните лица, а по прогласувањето на секој за светец, насобраните скандираа.
Холандскиот свештеник Титус Брандсма бил член на кармелитскиот верски ред и директор на Католичкиот универзитет во Најмехен. Тој отворено зборувал против нацистичката идеологија уште пред Втората светска војна и германската инвазија на Холандија во 1940 година.
Брандсма бил уапсен во 1942 година. Прво бил задржан во холандски затвори, а потоа одведен во злогласниот логор Дахау, каде што бил подложен на биолошки експерименти. На крајот бил погубен со смртоносна инекција на 61-годишна возраст.
Вториот новопрогласен светец е Шарл де Фуко, француски благородник, војник, истражувач и географ од XIX век, кој подоцна се преобратил и станал свештеник и живеел како пустиник меѓу сиромашните Бербери во Северна Африка. Убиен бил во Алжир во 1916 година.
Меѓу другите 8 лица канонизирани се Девасахајам Пилаи, кој беше убиен поради преобраќање во христијанство во Индија во XVIII век, и Сезар де Бус, француски свештеник од XVI век кој основал религиозен ред.
Папата Франциск канонизираше и двајца италијански свештеници, три италијански калуѓерки и една француска калуѓерка. Сите тие живееле помеѓу XVI и XX век.
„Овие светци влијаеле на духовниот и социјалниот развој на нивните народи и на целиот човечки род, а во денешниот свет, за жал, дистанцата се продлабочува, а тензиите и војните зачестуваат“, рече папата Франциск по мисата.
Тој додаде дека „светските лидери мора да бидат протагонисти на мирот, а не на војната“, алудирајќи на војната во Украина.
На сите нови светци им се препишуваат чуда.
