Поглаварот на Руската православна црква, Патријархот Кирил, изјави дека руските војници кои ќе загинат во војната во Украина ќе бидат „исчистени од сите гревови“, пренесе Reuters.
Изјавата на верскиот лидер следи неколку дена откако рускиот претседател Владимир Путин нареди мобилизација, прва од Втората светска војна. Кирил претходно ги критикуваше оние кои се противат на војната и ги повика Русите да се обединат. Тој е еден од клучните сојузници на Путин и поборник за војна во Украина, потенцира агенцијата.
„Многумина умираат на полето од меѓусебната борба“, изјави 75-годишниот Кирил во неговото прво неделно обраќање од потпишувањето на указот на Путин, за делумна мобилизација.
Патријархот додаде дека Црквата се моли борбите што побрзо да завршат, за што помалку „браќа загинат во овој братоубиствен конфликт“.
Поддршката на Кирил за војната во Украина го продлабочи јазот меѓу Руската православна црква и христијанските цркви ширум светот, наведе Reuters.
Поглаварот на Католичката црква, папата Франциск, е еден од гласните противници на војната и досега во повеќе наврати упати критики кон ставот на Кирил. Папата во говор претходно месецов изјави дека Господ не поддржува војна.