Легендарниот бразилски фудбалер Пеле апелираше до рускиот претседател Владимир Путин да ја запре „оваа изопачена и неоправдана агресија над Украина“. Бразилецот го направи тоа неколку минути пред почетокот на натпреварот меѓу Украина и Шкотска.
„Сакам денешниот натпревар да го искористам како повод и да испратам еден апел. Запрете ја инвазијата. Не постои ниту еден аргумент со кој може да се оправда ваквото насилство. Овој конфликт е изопачен, неоправдан и носи само болка, страв, терор и чувство на мачнина“, објави Пеле на Instagram.
Инаку, Пеле се познава со Путин, последен пат се сретнаа во 2017 година кога Русија играше во Купот на Конфедерации. Таа средба исто така ја опиша на Instagram.
„Кога се среќававме во минатото и разменувавме насмевки со долги ракувања, не очекував дека ќе дојде ден во кој ќе бидеме вака поделени на спротивни страни како што сме денес“, додаде славниот Бразилец.