Норвешкиот голгетер месец дена ќе биде без професионален фудбал бидејќи неговата репрезентација не обезбеди пласман на завршницата во Катар.
Предводникот на Манчестер Сити, Жузеп Гуардиола, изјави дека воопшто не е загрижен за формата на Ерлинг Браут Холанд поради паузата која играчот ќе ја има со неучеството на претстојниот Мундијал во Катар, пренесуваат британските медиуми.
„Зборував со играчите. Холанд ми рече дека ќе одмора во Марбеља и во Норвешка. Како ќе игра во вториот дел од сезоната зависи од тоа како ќе се однесува во Марбеља. Таму ќе игра голф, а јас само се надевам дека нема многу да јаде и да пие, па во клубот ќе се врати во најдобра форма“, изјави Пеп.
Марбеља е познато шпанско летувалиште во близина на Малага сместено на бреговите на познатата ривиера Коста дел Сол.
Истакна и дека верува дека Холанд ќе ги испочитува неговите добронамерни совети.
„Тој е паметно момче, има силна работна етика. Еден е од првите кои доаѓаат на тренинзите, воспитан е да живее како професионалец“, додаде каталонскиот стратег.
Сезонава Норвежанецот постигна 22 гола во сите натпреварувања за „Граѓаните“ од Манчестер, додека за репрезентацијата на Норвешка постигна 9 гола на 6 натпревари, погодувајќи на секој натпревар.
Премиер лигата ќе заврши со колото закажано за 12 и 13 ноември, по што ќе следува мундијалска пауза, а ќе продолжи дури на 26 декември. Норвешка има закажано две пријателски и тоа на 17 ноември на гости кај Ирска, а три дена подоцна дома со Финска, па Холанд дури и да игра на тие пријателски ќе има пауза и повеќе од еден месец.
