Русија претходно соопшти дека сите земји кои воведа санкции од почетокот на инвазијата на Украина, мора да го плаќаат гасот во рубли, но европските земји тоа не го прифатија.
На состанок на челниците на Европската Унија пред неколку дена, не беше пронајден заеднички став за барањето на Русија дека „непријателските земји“ мора да плаќаат за гасот во рубли, а не во евра.
Загриженоста околу безбедноста на снабдување со гас е засилена по побарувачката. А компаниите и земјите во ЕУ се обидуваат да ги сфатат последиците.
Руската централна банка, владата и Газпром, кои чинат 40% од европскиот увоз на гас, треба до утре пред Владимир Путин да ги изнесат нивните предлози за плаќање на гасот во рубли.
Портпаролот Дмитриј Песков зазеде јасен став нагласувајќи дека Русија нема да се занимава со „добротворна работа“
„Нема да испорачуваме бесплатно, тоа е јасно. Во нашата ситуација, ова е тешко возможно и не сакаме да се занимаваме со добротворна работа“, изјави Песков.
Тој нагласи доколку САД и европските сили не сакаат да плаќаат за гасот во рубли, едноставно нема ни да го добијат. Но, додаде дека Русија треба да ја донесе конечната одлука за тоа како да одговори ако европските земји одбијат да плаќаат во руска валута.
Сепак, сите министри за енергетика присутни на Г7 се сложни дека ова е еднострано кршење на склучените договори.
„Плаќањето во рубли е неприфатливо и ги повикуваме заинтересираните компании да не го исполнат барањето на Путин“, изјави Роберт Хабек, германски министер за економија и заштита на климата.