Медитеранските земји собрани под името MED 5 - Шпанија, Италија, Грција, Кипар и Малта - побараа од Европската Унија да покаже солидарност во распоредувањето на мигрантите кои пристигнуваат по море на ист начин како солидарноста со бегалците од Украина.
На границите на овие пет јужноевропски земји пристигнуваат бројни мигранти од Африка и Блискиот Исток, па бараат да се воспостави механизам преку кој мигрантите кои пристигнуваат би биле распоредени во сите 27 земји на ЕУ. Министрите за внатрешни работи на земјите од МЕД 5 се собраа викендов во Венеција, по што дадоа заедничко соопштение.
Се бара да се донесе одредба на следниот состанок на европските министри за внатрешни работи во рамките на Советот на ЕУ, според која земјите подеднакво би ги прифаќале мигрантите кои илегално влегуваат во Европа, на ист начин како што прифаќаат луѓе кои бегаат од војната во Украина.
„Ова е важно во овој нов глобален контекст, во кој не може да се исклучи тешка криза со храна како резултат на блокадата на извозот на жито“, рече италијанската министерка за внатрешни работи Лусијана Ламоргезе на заедничката прес-конференција.
Притисок врз медитеранските земји
Преговорите за Европскиот пакт за миграција и азил се во тек, па блокот МЕД 5 бара олеснување за да се намали притисокот што го чувствуваат за грижата за голем број мигранти. МЕД 5 претходно повика на еднаква распределба на мигрантите на претходните состаноци во Атина и Малага.
Шпанскиот министер за внатрешни работи Фернандо Гранде Марласка изјави дека е неопходно да се продлабочи соработката со земјите од кои доаѓаат мигрантите, како и со транзитните земји преку кои пристигнуваат во Европа.
Франција, која претседава со ЕУ до 30 јуни, предложи воспоставување механизам за распределба на мигрантите.
Дебатата за миграцијата трае веќе некое време во ЕУ, а несогласувањата настанаа во 2015 година по големиот бран мигранти кога некои земји, како Унгарија, ги отфрлија квотите што ги бараше Брисел во обид да ги олесни земјите на „првата линија“.
„Ние, група медитерански земји, изразивме единство, што е клучно за да се разгледаат нашите препораки“, додаде Гранде Марласка по дводневниот состанок.