Голем скандал го потресе шпанскиот фудбал откако беа објавени аудио снимки од разговорите меѓу фудбалерот на Барселона, Жерард Пике, и претседателот на Шпанската кралска фудбалска федерација, Луис Рубиалес, во кои тие преговараат за Суперкупот во Саудиска Арабија.
Пике, кој е познат по организирањето на различни спортски настани со својата агенција Kosmos Holding, во 2019 година се договорил со претседателот на РФЕФ, Луис Рубиалес, натпреварите од Суперкупот да ги префрли на Ријад и на тој начин за четири години да заработи 24 милиони евра.
El Confidencial објави ексклузивна аудио снимка од разговор со претседателот на РФЕФ.
„Види Руби. Ако Реал би добил 8 милиони, исто толку ќе оди и за Барса. Другите два тима ќе добијат 2 и 1 милион. Тоа се 19. Ти задржуваш 6 милиони за лигата, човече. Немаше ништо да заработиш претходно, а сега имаш 6 милиони. Можеме да бараме и повеќе од Саудиска Арабија и да им кажеме дека ако не платат, Реал нема да игра“, му вели Пике на Рубиалес во една од снимките.
Шпанскиот Суперкуп за прв пат се одигра во Саудиска Арабија во 2020 година. Реал ја освои титулата со победата над Атлетико во финалето, додека Барселона и Валенсија беа елиминирани во полуфиналето.
Шпанската кралска фудбалска федерација доби загарантирана добивка од 40 милиони евра, а Рубиалес имаше директна корист од оваа работа бидејќи тоа се одрази на неговата плата.
Од друга страна, агенцијата Kosmos Holding и Пике биле исплатени преку една саудиска компанија.
