Откако вчера беа објавени аудиоснимки од разговорот меѓу Жерард Пике и претседателот на Шпанската кралска фудбалска федерација, Луис Рубиалес, во кој го договараат Суперкупот во Саудиска Арабија, се огласи и фудбалерот на Барселона.
Пике истакна дека неговата компанија Kosmos Holding посредувала за префрлање на натпреварите од шпанскиот Суперкуп во Саудиска Арабија и дека сè било направено според законот.
Според четиригодишниот договор што бил постигнат, РФЕФ добива 40 милиони евра годишно, а Пике 6.
„Сè е направено по закон. Адвокатите на Kosmos се подобро информирани од мене и правно гледано сè е во ред. Единствено незаконски во целата оваа приказна е тоа што некој го прислушувал мојот разговор со Рубиалес и го проследил до медиумите“, изјави Пике во директно обраќање на Twitch.
Пике, кој е сопственик на третолигашот Андора, исто така истакна дека нема конфликт на интереси, и дека зел помалку пари отколку што можел.
„Што се однесува до судирот на интереси, сите можете да видите дали федерацијата, судиите или кој било ми помага мене, на Барселона или на Андора. Горд сум што ѝ помогнав на федерацијата. Суперкупот ѝ носеше на федерацијата 120.000 евра, а сега носи 40 милиони. Дел од тие пари добиваат и второлигаши и третолигаши, тоа е проект од интерес на сите клубови во Шпанија. Што се однесува до парите што ми припаднаа мене, не ми се важни. Важно ми е проектот да е успешен и затоа побарав само 10% провизија, а реално е компаниите кои посредуваат во вакви договори да земаат и меѓу 15 и 20 проценти“, рече Пике.
