Стратегот на Јувентус е претпазлив во пресрет на утрешното дерби со Рома која е бод пред неговиот тим на табелата.
Утре вечер од 18 часот на „Алианц“ стадионот во Торино се игра дербито на 21. коло во Серија А помеѓу Јувентус и Рома. Гостите се одлични сезонава и моментално се трети со 40 бодови, еден повеќе во однос на тимот предводен од Андреа Пирло.
„Пред нас е натпревар против еден тим кој го игра можеби најубавиот фудбал во Италија. Мора да бидеме внимателни, имаат играчи кои се вешти со нозете особено при контра напади. Мора добро да се браниме, да грешиме малку за да не им пружиме шанси да нѐ фатат на контри“, изјави Пирло на денешната прес-конференција.
Во првиот натпревар сезонава кој се одигра во Рим двата тима ги поделија бодовите играјќи 2:2, а римјаните на двапати поведуваа.
„Ментално сме подобрени. Нокаутот од Интер ни помогна да сфатиме дека мораме на секој натпревар да сме добро сконцентрирани, да имаме мотивација. Доколку не сме тип-топ е тешко да се игра против било кого. И на терен сме подобрени, особено при транзицијата. Секогаш може подобро, но имаме малку време за тренинг и за да ги проучиме грешките“.
Се вели дека голема предност за Јуве ќе биде неиграњето на Един Џеко кој е во кавга со тренерот Паулу Фонсека. Но, Пирло не се согласува.
„За нас тоа не менува ништо. Ако не игра тој, ќе игра Мајорал кој е одличен играч, има голем потенцијал и игра добро. Џеко е великан, но и за нив нема многу да смени“.
