Екипата на скопски МЗТ доживеа елиминација од АБА2 лигата откако денеска не успеа да ја надокнади големата негатива против тимот од Земун.
Во четвртфиналното разигрување МЗТ на првиот натпревар пред два дена загуби со високи 20 поени разлика (95:75) од Младост на неутрален терен во Подгорица и практично ја направи работата претешка за реваншот.
Денеска, во истата сала „Морача“ во црногорската престолнина МЗТ славеше победа од 92:86, но шесте поени разлика беа премалку за чудо. Американецот Хасани Гравет и Босанецот Иван Карачиќ беа најефикасни на паркетот со по 21 поен, а овој вториот запиша и 9 скокови.
Со тоа трета сезона со ред паѓаат во вода плановите на тимот од скопската населба Аеродром да се врати во првата АБА лига. Затоа во игра и натаму е земунски Младост кој во полуфиналето ќе игра со победникот од дуелот помеѓу домаќинот Студентски центар и Слобода од Ужице.
Победникот на АБА2 лигата ќе избори пласман во елитата наредната сезона.