Закажаната седница ќе продолжи после еден час откако иницијаторите избројаа 60 пратеници, еден помалку од потребното мнозинство за изгласување недоверба на владата.
Пратеникот Кастриот Реџепи од Беса на социјалните мрежи откри дека одлучил да не се појави на денешното гласање недоверба бидејќи добил информација дека во декември голема е шансата државата да добие датум за преговори за ЕУ.
„Една од главните причини за мене и за политичкото Движење Беса на која припаѓам е евроатлантската интеграција на РСМ. Со оглед на политичкиот моментум, по одложувањето на оставката на премиерот Заев, за доброто на процесот и силните сигнали од стратешките партнери САД и земјите од ЕУ кои ми беа доставени од високи дипломатски претставници, дека во декември земјава има големи шанси да добие датум за почеток на преговорите за членство во ЕУ, одлучив да не учествувам на собраниската седница на која требаше да се донесе одлука со која ќе се доведе во прашање оваа витална национална и државна цел. Како одговорен политичар и пратеник, оваа одлука не ја донесов лесно, ставајќи го интересот на народот и државата на прво место. На државата во овој значаен период не ѝ треба политичка криза и потопување во турбулентни води полни со непознати“, објави тој на својот Facebook профил.
Во меѓувреме во Собранието пристигнаа и двајцата пратеника заразени со COVID-19, кои се во скафандри и под посебен протокол.
Завчера Димитар Апасиев од Левица кратко објави „62“ алудирајќи дека мнозинството има 62 пратеника, но денеска тоа се покажа како невистинито, барем засега.