По повеќе од еден век египтолозите успеаја да откријат уште два комплетни примероци од фајумските портрети, како и една исклучително ретка фигура на божица.
Пред нешто повеќе од 110 години британскиот археолог Флиндерс Петри во оазата Фајум во Египет открил 146 портрети на ковчезите во кои биле сместени мумиите. Истражувачите кои уште од 2016 година ископуваат во истиот регион на наоѓалиштето Герза сега успеаја на оваа колекција да додадат уште два комплетни и неколку фрагментирани портрети.
Наодите се откриени среде рушевини кои според истражувачите од Арехеолошкиот институт од Австрија припаѓаат на остатоци од некогашниот древен град Филаделфија, на само 120 километри југозападно од Каиро. Според нив, тука се откриени и: згради, папируси, грнчарија и ковчези кои датираат од птоломејскиот и римскиот период, или од 305 година п.н.е. до 390 година од новата ера.
Сепак, со својот изглед и значењето, покрај портретите од сите наоди, се истакнува и откривањето на статуата од божицата Изида-Афродита од теракота внатре во еден од ковчезите, што претставува своевиден раритет според тврдењата на археолозите. Шефот на проектот, Басем Гехад, откри дека таа го одржувала влијанието на Хелените во египетската уметност, како резултат на мешањето на заедницата која живеела на овое простори.
Владата на оваа земја соопшти дека откритијата даваат увид во социјалните, економските и верските практики на луѓето кои некогаш живееле на тие простори. Владини претставници објаснуваат и дека фајумските портрети ги прикажуваат некои од најбогатите членови на заедницата, пракса што била типична кај древните Хелени, а така правеле и древните Египќани за време на периодот од 600 години.
Гехад во својата изјава за медиуми откри дека „никој не го знае контекстот што се крие зад овие портрети“, но се надева дека во иднина ископувањата во овој регион ќе резултираат со уште слични наоди кои тој и неговите колеги со помош на модерната технологија ќе можат да ги испитаат и да дадат поконкретни одговори на ова прашање.
