Квалификациите за Мундијалот 2026 започнаа во Азија и Јужна Америка, а Африка во среда ја започнува својата двегодишна квалификациска кампања за да се утврди кои ќе ги пополнат деветте директни места на настанот чиј домаќини ќе бидат Канада, Мексико и САД.
Повеќе места за Африка на следното Светското првенство не го намалија интензитетот на квалификацискиот процес, често опишан како најтешкиот во светскиот фудбал, кој започнува оваа недела. Проширувањето на Мундијалот од 32 на 48 репрезентации значи дека африканската квота на учесници е зголемена од 5 на 9, со можност за уште едно место преку новиот систем за меѓуконтинентални баражи што е воведен.
Долгите растојанија што треба да се поминат, во комбинација со лошите и ретки воздушни врски, екстремната клима, бедните терени и стадиони и распространетата култура на непријателство кон гостинските репрезентации, го означија африканскиот квалификациски процес како најтешок од шесте континентални конфедерации.
За Светското првенство во 2026 година, 54-те африкански учесници се поделени во 9 групи, а само на победниците ќе им биде загарантиран пласман на Мундијалот. Четирите најдобро рангирани второпласирани ќе учествуваат во плејофот за одредување на еден тим што ќе се пласира во меѓуконтиненталниот бараж според новиот систем, во кој по една репрезентација од секој континент ќе учествува на мини-турнир за одредување на последните две мундијалски места.
Вкупно 13 африкански земји, почнувајќи од Египет во 1934 година, досега играле на завршницата на Мундијалите, а Камерун е најчестиот учесник со вкупно 8 настапи. Камерунците ја започнуваат својата кампања со домашен натпревар во Дуала в петок против Маврициус, пред да отпатуваат за Либија следниот вторник во рамките на групата Д.
Мароко, кој лани стана првата африканска земја што стигнала до полуфинале на Светско првенство, требаше да игра со Еритреја в четврток, но сиромашната источноафриканска нација неочекувано се повлече.
Причината не беше наведена, но пустинската земја во Рогот на Африка веќе ги има видено своите играчи како бегаат и бараат политички азил секогаш кога ќе одат на натпревари во странство. Првиот натпревар на Мароко во групата Е е следниот вторник на гостувањето кај Танзанија, со која ќе играат и на Африканскиот куп на нации во јануари, а чиј домаќин е Брегот на Слоновата Коска.
Зимбабве, кој беше исфрлен од последните квалификации откако не успеа да се договори со својот поранешен селектор, се враќа по уште едно отсуство, овојпат поради политичко мешање во работата на нивниот фудбалски сојуз, за да се соочи со Руанда на гости во среда. Тоа е првиот од 260-те натпревари во африканските квалификации кои ќе завршат во октомври 2025 година.
Зимбабве ќе остане во Руанда по отворањето на групата Ц во среда и таму ќе ѝ биде домаќин на Нигерија в недела. Зимбабве нема одиграно меѓудржавен натпревар речиси две години и е една од 19-те земји чии стадиони се етикетирани како несоодветни според меѓународните стандарди, принудувајќи ги да ги преселат своите домашни натпревари на неутрален терен.
Други на кои им е забрането да играат дома се: Буркина Фасо, Бурунди, Гамбија, Гвинеја, Есватини, Етиопија, Јужен Судан, Лесото, Намибија, Нигер, Саун Томе и Принсипе, Сејшели, Сиера Леоне, Сомалија, Судан, Централна Африка, Чад, Џибути.