Археолози пронашле неверојатно откритие на местото Митла во јужниот дел на Мексико – лавиринт од соби и премини скриени под црква што го претставува влезот во подземниот свет.
Кога древните Запотеци ги изградиле овие структури пред повеќе од 1.000 години, тие се сметале за храм и биле познати како Лиоба, или „место за одмор“. Се чини дека во рамките на оваа мрежа од ходници и сали, сместена на 5 до 8 метри под површината, има и неколку гробници.
Научниците ја скенирале областа на три начини; радар, томографија со електрична отпорност и сеизмичка томографија. Потоа ги обработиле сите податоци и создале детална мапа на овој скриен подземен храм. Денес на тоа место има црква изградена од мисионерите. Влезот во подземната мрежа е скриен зад олтарот.
Имено, кога пристигнале мисионерите, запишале информации за древниот лавиринт, а потоа го запечатиле влезот во Лиоба. Во списите на доминиканскиот отец Франсиско де Бургоа од 1674 година, постои опис на подземен храм кој споменува четири пространи, меѓусебно поврзани комори и неколку пештери и премини длабоко под земја.
Запотеците верувале во подземјето, обожувале повеќе богови, а ритуалите им биле многу важни. Експертите веруваат дека храмот се користел до крајот на XV век, по што со регионот најпрвин владееле Ацтеките, а потоа и Шпанците, пишува Science Alert.
Благодарение на најновите техники за 3D скенирање, археолозите успеале повторно да ја откријат и мапираат оваа древна мрежа на премини, при што ова е само првата фаза од проектот „Lyobaa“.
