Пол Погба неодамна се најде среде бизарен скандал кога брат му Матијас во видеообраќање најави дека ќе ја објави вистината за францускиот репрезентативец, велејќи дека ќе открие колку злобен човек е тој.
Матијас тврди дека Пол преку врач го проколнал Килјан Мбапе. Од друга страна, Пол одговори дека со месеци е жртва на изнуда на неговите поранешни пријатели и брат му Матијас.
Пол Погба веќе платил значителна сума пари, скоро 100.000 евра, на лицата кои му се закануваат.
Во второто сослушување на суд, Пол негираше дека ангажирал врач за да фрли клетва на Килјан Мбапе за да се повреди, како што претходно тврдеше Матијас. Верзијата на Пол е дека тој навистина платил за врач, но за да помогне на хуманитарна организација, не за да му наштети на Мбапе, пренесе Franceinfo.
Погба смета дека неговиот постар брат е под притисок на криминалци кои сакаат да му наштетат. Неодамна Пол двапати го сменил телефонскиот број за да ги избегне малтретирањата од изнудувачите, но залудно. Го уценуваат и бараат 13 милиони евра.
Француските медиуми пишуваат дека првин му барале 13 милиони евра, а потоа и итна исплата од 3 милиони евра. Пол не можел да повлече толку пари од банка, па платил само 98.915 евра, пишува Marca.
