Организаторите на наградите Златна малина, со кои се оддава почит на најлошиот филм во годината, му ја поништија наградата на Брус Вилис, откако семејството на актерот откри дека тој се бори со афазија, здравствена состојба која влијае на неговите когнитивни способности.
„По долго размислување Златна малина одлучи да ја укине наградата што му беше доделена на Брус Вилис поради неговата неодамна објавена дијагноза“, се вели во соопштението.
„Доколку нечија здравствена состојба е фактор во донесувањето одлуки и/или перформансите, признаваме дека не е соодветно да му се даде наградата“, додаваат тие.
Во средата семејството на Вилис, вклучително и неговата поранешна сопруга Деми Мур, во заедничка изјава соопштија дека актерот ќе паузира од актерството поради неговата здравствена состојба.
„Ова е навистина предизвикувачки период за нашето семејство и ја цениме вашата континуирана љубов, сочувство и поддршка“, се вели во соопштението.
Според клиниката Мајо, афазија е „состојба што ве лишува од способноста за комуникација“ и може да биде предизвикана од мозочен удар, повреда на главата, тумор на мозокот или болест.
Оваа година организаторите на Златната малина го номинираа Вилис за 8 негови филмови во категоријата именувана по него, „Најлошата изведба на Брус Вилис во филм од 2021 година“.
На крајот, беше одлучено дека неговата улога во филмот „Cosmic Sin“ е победничка.
„Категоријата никогаш не требаше да биде постојан дел од Златната малина. Затоа нема да се повтори“, се додава во соопштението.
Тие исто така рекоа дека навистина им е жал за дијагнозата на Брус Вилис.