Лондон, 17 јуни 2020 (МИА) – Градоначалникот на Лондон, Садик Кан денеска изјави дека ја намалил својата плата за 10 отсто поради пандемијата со COVID-19 и ја повика британската Влада да ги поддржи локалните власти за да се избегне намалување на јавните услуги.
Кан, чија годишна плата изнесува 152.734 фунти (170.000 евра), исто така „ги замрзна“ платите на својот 15-член тим.
– COVID-19 имаше разорно влијание врз јавните финансии на Лондон, кои беа одлични пред пандемијата, посочи Кан.
Приходите на лондонскиот транспортен оператор (ТфЛ) за време на пандемијата се намалија за повеќе од 90 отсто, а приходите од даноците, исто така забележаа пад откако голем број домаќинства и фирми не се во состојба да ги плаќаат.
Кан предупреди дека без владина поддршка ќе биде неопходно намалување на буџетите на полицијата, пожарникарите и јавниот превоз.
– Ова е најлош момент за враќање на мерките за штедење, сега кога мораме да вложуваме во заздравувањето на Лондон, посочи Кан, додавајќи дека сите локални самоуправи во Велика Британија се соочуваат со истите финансиски предизвици.
Локалните избори во Велика Британија требаше да се одржат во мај, но поради пандемијата ќе се одржат следната година.