Ако често имате кошмари, не грижете се, не сте единствените. Според истражувањето од 2010 година објавено во списанието Sleep, 5,1% од општата популација има барем еден кошмар неделно. Иако сите знаеме дека кошмарите се страшни, дали некогаш сте се запрашале што е всушност кошмар?
Како што дефинираа експертите од клиниката Мајо, „кошмарот е вознемирувачки сон поврзан со негативни чувства, како што се анксиозност или страв што нè буди“. Тие се почести кај децата, но може да се појават и кај возрасните и обично се појавуваат во втората половина од ноќта сме во делот на сонот со забрзани движења на очите, односно РЕМ фазата.
Главната разлика помеѓу кошмарот и лошиот сон е тоа што анксиозноста предизвикана од кошмар обично ќе нè поттикне да се разбудиме. Додека невронаучниците сè уште дебатираат за тоа што предизвикува кошмари, постојат силни докази дека причините се хроничен стрес или анксиозност, проблеми со менталното здравје, недостаток на сон, одредени видови лекови и откажување од лекови.
Што знаат истражувачите за врската помеѓу храната и кошмарите?
Истражувањето објавено во списанието за клиничка медицина за спиење заклучи дека јадењето пред спиење е поврзано со негативните ефекти врз спиењето кај здравите возрасни лица. Ако сте личност која е склона кон доцни вечери или полноќни закуски, треба да знаете каков вид на храна треба да избегнувате.
Врз основа на истражувањето објавено во научното списание Frontiers in Psychology од 396 студенти на додипломски студии, млечните производи најчесто се поврзуваат со вознемирувачки соништа. Исто така, зачинетата храна ја издвоиле учесниците кои имале кошмари.
Сепак, потребни се повеќе истражувања за со сигурност да се заклучи дали млечните производи, зачинетата храна или друга храна можат да влијаат на соништата. Ако се чувствувате гладни пред спиење, здравствените експерти генерално предупредуваат дека јадењето солена брза храна или слатки не е најдобрата идеја. Изберете храна богата со хранливи материи, како јаткасти плодови, бобинки или малку темно чоколадо, за да го задоволите гладот. Помалку е веројатно дека тие негативно ќе влијаат на вашиот метаболизам и ќе го нарушат режимот на спиење.
