Британскиот пратеник и член на Конзервативната партија Боб Сили најави дека планира да предложи закон што ќе овозможи на принцот Хари и Меган Маркл да им бидат одземени титулите војвода и војвотка од Сасекс.
Нацрт-законот се очекува да биде готов до крајот на годината и ќе им овозможи на британските парламентарци да гласаат за давање овластување на Тајниот совет да го деградира кралскиот статус на двојката.
Сили потврди дека ќе го напише предлогот за новиот закон, само еден ден по објавувањето на документарниот филм за Хари и Меган на Netflix, што предизвика бес кај некои кралски фанови. Сепак, тој тврди дека размислувал за предлог-законот уште пред документарецот, истакнувајќи дека имало „политички проблем“ со коментарите на Хари, бидејќи Хари престанал да работи како постар член на кралското семејство пред повеќе од две години.
Многу проблематичен пар
Нејасно му е зошто Хари продолжил да ја користи својата титула додека истовремено ја „уништувал институцијата на монархијата и неговото семејство“.
„Покрај тоа што го уништува неговото семејство и заработува на својата беда, тој напаѓа и некои важни институции во оваа земја“, рече Сели, според Sky News.
За потенцијалното отстранување на титулите коментираше и министерот за вработување Гај Оперман, кој е убеден дека Хари и Меган се „целосно ирелевантни“ за напредокот на Обединетото Кралство, како и на целото кралско семејство.
„Мислам дека тие се очигледно многу проблематичен пар, што мислам дека секој што ќе ги погледне може да каже колку е тажна состојбата на работите. Затоа се согласувам дека тие се целосно ирелевантни за оваа земја и напредокот на оваа земја и кралското семејство што сите ние го поддржуваме“, рече Оперман.