Најдобрата македонска судијка, Ивана Пројковска, е првата жена што ќе ја дели правдата на еден натпревар од најдобрата машка македонска фудбалска лига (1.МФЛ).
Историскиот момент за македонскиот фудбал ќе се случи на 2 април во Тетово каде Шкендија ќе ја пречека Победа во 25. коло. Почетокот на натпреварот е закажан за 15 часот.
Помошници на Пројковска ќе бидат Дејан Костадинов и Гоце Петрески.
Најдобрата македонска фудбалска судијка се наоѓа во топ 20 делителки на правдата во Европа. Таа неодамна судеше четвртфинален натпревар во женската Лига на шампионите (Баерн - Арсенал).
Потегот на Фудбалската федерација на Македонија да ја делегира Пројковска за главен судија на натпревар од 1.МФЛ е за поздравување и влева надеж дека со ова се отвора патот и за други квалитетни македонски судијки да бидат дел од прволигашки натпревари во машка конкуренција.
