Напаѓачот на Аугсбург вели дека недостатокот од бучава на трибините е вистинскиот виновник за тоа што тој синоќа промаши пенал.
Во 27. минута Аугсбург доби шанса да го отвори резултатот на домашен терен против Келн откако главниот судија Бенјамин Кортус покажа на белата точка поради стартот на голманот Хорн над Ноа Саренрен.
„Ја направив најголемата грешка која еден пеналџија може да ја направи. Глупави натпревари без публика“, рече 29-годишниот Нидерлехнер по натпреварот.
Додека Нидерлехнер се подготвуваше да го изведе пеналот, противнички играч му довикна на голманот Тимо Хорн дека напаѓачот на Аугсбург милува да шутира во десниот агол. Но, бидејќи Нидерлехнер го слушна разговорот, реши да отстапи од неговата пенал-рутина што резултираше со тоа што Хорн му го одбрани ударот.
„Всушност, јас секогаш шутирам во аголот, десно. Оставив ситуацијата да ми влијае. Често сум бил херој, но денес испаднав будала“, вели тој.
За Флоријан токму тоа што на натпреварите нема публика придонело за да ја направи таа промена во последен момент. Со публика на трибините немаше да го слушне разговорот на противниците бидејќи навивањето ќе ги пригушеше нивните зборови.
Нидерлехнер сезонава ги одигра сите 30 натпревари во Бундеслигата на кои постигна 11 голови од кои 1 од белата точка.
Аугсбург и Келн синоќа ремизираа 1:1 на „ВеВеКа“ арената и тоа со голови во последните пет минути. Поведоа гостите преку Антони Модест во 85-та, а три минути подоцна израмнија домаќините преку Филип Макс. Нидерлехнер го извадија во 76. минута.
