Светското првенство во 2026 година ќе се игра во САД, Мексико и Канада, а УЕФА го одреди начинот како ќе изгледаат европските квалификации за натпреварувањето на кое ќе учествуваат дури 48 репрезентации.
Места на Мундијалот за репрезентациите членки на УЕФА ќе има дури 16, сите преку квалификации, во кои ќе игра и Македонија. Но, патот е далеку од лесен.
Квалификациите ќе бидат поделени на два дела, а ќе почнат со фаза по групи каде ќе се формираат дури 12 групи со по 4 или 5 репрезентации.
Директен пласман на првенството ќе изборат победниците од секоја група, а натпреварите од овие групи ќе се играат од март до ноември 2025 година.
Можност за пласман во најголемото светско натпреварување ќе имаат и сите второпласирани репрезентации од групите, како и четирите победници на групите од Лигата на нации од сезоната 2024/2025, кои не избориле пласман преку квалификациите.
Тоа значи дека вкупно 16 репрезентации ќе играат по систем на мини турнири, поделени во четири патеки, по систем од еден натпревар во полуфиналето и еден во финалето, а претходно двојките ќе бидат одредени со жрепка. Четирите најдобри селекции ќе се пласираат на Светското првенство.
Шестнаесетте европски репрезентации ќе им се придружат на останатите 32 на Мундијалот 2026, каде ќе бидат извлечени 12 групи, секоја со по 4 репрезентации.
Останува сега ФИФА да го прифати, одбие или измени моделот усвоен од УЕФА за мундијалските квалификации 2026.
