Креативецот од средниот ред денеска доби позитивен тест на коронавирус и веднаш е ставен во изолација.
Отакако репрезентацијата на Македонија синоќа се комплетираше за денес да ги почне подготовките за претстојното Европско првенство, сите фудбалери и стручниот штаб направија тестирања за коронавирусот.
Резултатите денес дадоа еден позитивен тест и тоа оној на фудбалерот на шпански Леванте, Енис Барди. Тој е асимптоматски и се чувствува добро.
„Енис Барди е без симптоми и се чувствува добро. Ние како лекарски тим постојано ја следиме неговата здравствена состојба. Пред извесно време имал контакт со дел од играчите на Леванте кои исто така имаат позитивен тест на COVID-19“, вели Александар Савески, кој е дел од лекарскиот тим во македонската репрезентација.
„Важно е да се напомене дека пред почетокот на собирот на репрезентацијата беа почитувани и запазени сите протоколи согласно УЕФА здравствените регулативи сѐ со цел да се избегне контакт со останатите фудбалери и членови на репрезентацијата. Останува да се следи состојбата и да веруваме дека ќе помине без промена на клиничката слика“, дополнува тој.
Барди сега ќе чека негативен тест при наредното тестирање и додека не добие зелено светло нема да тренира со останатите фудбалери. До почетокот на Еваропското првенство има доволно време за да се опорави, но останува да видиме.
Репрезентацијата денеска ќе тренира на тренинг центарот на ФФМ од 18:30 часот.