Јохавед Лифшиц (85), која беше една од двете заложнички ослободени од заробеништво на Хамас минатата ноќ, вели дека поминала низ пеколот опишувајќи како била киднапирана од вооружени лица на Хамас на мотори.
Ослободената жена зборуваше на прес-конференција во болницата во Тел Авив, придружувана од ќерка си Шерон, која ѝ помагаше на мајка си да го раскаже своето тешко искушение.
Лифшиц вели дека преку капијата била донесена во Газа и дека добила модринки од возењето. Таа исто така вели дека имала проблеми со дишењето.
Додава дека израелската влада потрошила милијарди на граничната ограда, но не направила ништо за да го спречи Хамас да премине.
„Мајка ми ја одведоа со мотори и ја тепаа со палки“, раскажува ќерка ѝ опишувајќи ја огромната мрежа од подземни тунели со кои управува Хамас, а која ја споредува со пајакова мрежа.
Ќерката додала дека часовникот и накитот на мајка ѝ ѝ биле извадени додека ја возеле.
Кога се симнала од моторот, луѓето што ја поздравиле ѝ рекле дека „веруваат во Куранот“ и затоа нема да ја повредат – рекла ќерката.
Мајка ѝ и уште 24 луѓе биле однесени во тунелите, кои таа ги опишува како „мека, влажна земја“.
Раскажува дека по два-три часа, одвоиле пет лица од кибуцот Нир Оз во посебна просторија и дека таму имало чувари, болничар и лекар.
Самата Лифшиц дополнително ги опишува чистите услови и чуварите, кои се грижеле за „секој детаљ“. Тие биле хранети со бело сирење и краставици, со истата храна што ја имале и киднаперите.