Од следната година, во училиштата во Италија, во сите одделенија, задолжително ќе има настава за климатски промени и одржливост, како дел од обидите на земјата да се позиционира како лидер во еколошкото образование во светот.
Министерот за образование Лоренцо Фиорамонти, од редовите на антиестаблишмент-ориентираното Движење 5 ѕвезди (Movimento 5 Stelle), рече дека во наставната програма на јавните училишта ќе има околу 33 часа годишно посветени на теми во врска со климатските промени.
Овие часови ќе бидат вметнати во наставата за граѓанско образование, појасни портаполот на министерот, Винченцо Крамароса.
„Идејата е граѓаните на иднината да бидат подготвени за алармантаната климатска ситуација“, рече тој.
Материјалите за одржлив развој ќе бидат инкорпорирани во традиционалните предмети како географија, математика и физика.
Фиорамонти, кој работел како професор по економија на Универзитетот во Преторија, Јужна Африка, во интервју за Reuters рече дека целото министерство „се менува за да станат одржливоста и климата центарот на образовниот модел“.
„Сакаме италијанскиот образовен систем да биде првиот во светот што ги става животната средина и општеството во сржта на сѐ што учиме во училиште“, рече министерот.
Движењето 5 ѕвезди, од чии редови доаѓа тој, има историја на кампањи за заштита на животната средина и grassroots активизам.
Откако беше поставен на министерската позиција, Фиорамонти наидува на критики од десничарските опозициски партии бидејќи ги поддржува студентските протести против климатските промени и се залага за повисоко оданочување на производите од пластика и пијалаците што содржат многу рафинирани шеќери.