Грижата за женското здравје е еден од приоритетите на Министерството за здравство. Во тек е организиран скрининг за рана детекција на рак на грло на матка.
Првпат жените имаат можност превентивен преглед да закажат електронски преку пријавување на веб платформата – skrining.mk , објави попладнево на својот Facebook профил министерот за здравство Беким Сали.
Со организиран скрининг оваа година, посочува Сали, се опфатени жените на возраст од 36 до 45 години, кои во последните три години немаат направено ПАП тест.
– Прегледот, во рамки на скринингот за оваа возрасна група е бесплатен. Целта ни е да го зголемиме опфатот на жени кои ќе направат преглед, имајќи предвид дека раната детекција и превенција на ракот на грлото на матката е еднакво важна и во услови на пандемија. Матичниот гинеколог ги повикува жените со датум и час кога треба да се направи ПАП тестот. Следната година ќе биде опфатена друга возрасна група. Ова се прави согласно препораките на СЗО, интервалот на спроведување на скринингот е три години за да се опфатат сите возрасни групи, напиша Сали.
Оваа активност, потенцира министерот, се реализира во соработка со „Мој Термин“, УНФПА и Националната комисија за рак на грло на матка при Министерството за здравство кои изминатиот период интензивно работеа на оваа новина.
Пет симптоми на рак на грлото на матката кои не треба да ги игнорирате
Причината за скоро сите карциноми на грлото на матката се инфекции со хуман папилома вирус (ХПВ), па затоа е разбирлива загриженоста кај жените кога ќе им биде дијагностициран ХПВ, но здравствените експерти велат дека тоа не е причина за тревога.
ХПВ инфекцијата не е преканцерозна состојба, а уште помалку рак. ХПВ обично нема симптоми и обично имунолошкиот систем на телото сам го отфрла по некое време.
Само мал број на продолжени инфекции со ХВП резултираат во промени во ткивото што можат да бидат претходник на рак на грлото на матката, а тестирањето за ХВП најчесто се прави за да се процени ризикот од рак.
Постојат повеќе од сто варијанти на ХПВ, што е најчеста сексуално пренослива инфекција. Повеќето сексуално активни жени и мажи ќе бидат заразени во одреден момент од нивниот живот, а некои може да се заразат повторно, според Светската здравствена организација (СЗО).
Колку дебелината го зголемува ризикот од рак на матката?
Во делови на Европа, жените над 35 години сега рутински се тестираат за ХВП како дел од скринингот за карцином. Како резултат, откриени се повеќе инфекции отколку што беше случај претходно.
Позитивен тест укажува на клинички значајна ХПВ инфекција на грлото на матката и зголемен ризик од промени во ткивото. Во овој случај, следниот тест се прави по една година.
Ако и тој е позитивен, три месеци подоцна жената се подложува на колпоскопија. Колпоскопија е медицинска постапка што ги набљудува грлото на матката, вагината и вулвата под големо зголемување со помош на специјално дизајниран подвижен микроскоп, наречен колпоскоп.
Во случај да бидат откриени само мали промени во ткивото, жените мора да одат на почести прегледи за да ги следат овие промени. Големите промени можат да бидат преканцерозни и затоа се отстрануваат како мерка на претпазливост.
Постојат вакцини против ХПВ. Постојаниот комитет за вакцинација на институтот Роберт Кох, одговорен за контрола и превенција на болести во Германија, препорачува момчињата и девојчињата да се вакцинираат против ХВП на возраст од 9 до 14 години.
