Раководството на ПСЖ продолжува со политиката што ја започна по трансферите на Килјан Мбапе и Нејмар. Францускиот гигант ги изненади сите и, иако со недели се зборуваше за трансфер на Ектор Белерин во тимот, нов десен бек на тимот ќе биде Алесандро Флоренци од Рома.
Стручњакот за трансфери, Џанлука Ди Марцио, беше првиот кој објави дека италијанскиот репрезентативец ќе се пресели на „Паркот на принцовите“ во наредните денови, првично на позајмица на една година, а клаузулата за откуп ќе биде додадена на договорот за летото 2021 година.
До неодамна се водеа преговори со Арсенал за Белерин за ваква зделка, но „Топчиите“ ја одбија опцијата за позајмица и побараа директен трансфер за околу 30 милиони евра.
Флоренци, кој играше како десно крило на почетокот на својата кариера, ќе го замени Тома Муние, кој по завршувањето на сезоната се пресели во Борусија од Дортмунд. Во составот на ПСЖ тој ќе се бори за место во почетниот состав со Тило Керер, кој го замени Муние во стартните 11 на Томас Тухел.
Ова ќе биде трет официјален трансфер на тимот од Париз ова лето, откако клубот ја искористи откупната клаузула на Мауро Икарди и го купи голманот на Севиља, Серхио Рико, кој ќе биде резерва на Кејлор Навас.
