За жарот на навивачите на Бока Жуниорс нема што многу да се каже, а во јавноста се појавија загрижувачки видеа за пукањето на трибината под нозете на присутните на познатата „Ла Бомбонера“.
Навивачите на Бока Жуниорс се едни од најстрасните во светот. Како што е веќе симболично за Аргентина, навивачите на сите четири трибини не мируваат пред, за време и по натпреварите, а во такви услови, за жал, не се ретки катастрофите со смртни исходи.
Најмалата трибина на „Ла Бомбонера“ се ниша од атмосферата која ја создаваат навивачите на Бока и така било отсекогаш, а последните денови се појави нова пукнатина која предизвикува оправдан страв во јавноста.
На социјалните мрежи кружи видео на кое се гледа голема пукнатина која се појавила на една од трибините каде што се сместени домашните навивачи. Пукнатината на подот на еден од горните катови на трибината предизвикува таа да се „мрда“ при скокањето на навивачите.
Видеата се направени за време на реванш натпреварот од Копа Либертадорес помеѓу Бока Жуниорс и бразилски Коринчјанс кој се одигра ноќта на 6 јули. Заврши без голови, исто како и првиот дуел во Бразил, а Коринчјанс победи на пенали со 6:5 и се пласираше во четвртфиналето.
Познатиот стадион „Алберто Хосе Армандо“, популарно познат како „Ла Бомбонера“ (бонбониера - кутија со чоколади) е изграден во 1940 година, но е реновиран во 1996 година. Сепак, се чини дека никогаш не бил во полоша состојба и надлежните мора да се погрижат да не дојде до сериозна катастрофа.
Она што е уште поинтересно е што соблекувалната на гостинската екипа се наоѓа под местото каде што се појави пукнатината. Легендата вели дека навивачите на Бока намерно скокаат за да го заплашат ривалот пред почетокот на натпреварот.