Рускиот претседател Владимир Путин одржа говор во кој се осврна на најавените референдуми на територијата на Украина, како и понатамошните чекори на Руската Федерација во оваа држава.
Путин најави спроведување на делумна мобилизација.
„Зборувам за делумна мобилизација, ќе ги мобилизираме оние кои се во резерва, кои имаат искуство во армија и во борби. Пред да бидат испратени на фронт, ќе минат низ обука. Одлуката е потпишана, мобилизацијата се организира од денес. Ги повикувам сите региони да ни дадат поддршка во ова. Сакам да им порачам нешто на тие што ќе бидат мобилизирани. Ќе им бидат гарантирани истите услови како и на војниците кои се под договор“, соопшти рускиот претседател.
Потоа се осврна и на дејствувањето на Западот.
„Западот ги премина сите граници. Слушаме закани против нас, против нашата земја. Зборуваат дека ќе им дадат ракети од долг дострел со кои ќе можат да го гаѓаат Крим и други делови од нашата територија како што се Курск и Белгород. Повеќе не кријат дека Русија мора да биде уништена“, изјави рускиот лидер.
Испрати и предупредување до западните земји кои продолжуваат да ја поддржуваат Украина.
„Сакам да ве предупредам. Нашата земја исто така има силно оружје и помодерно од вашето. Територијалниот интегритет на нашата земја ќе биде заштитен и ќе се користи сѐ што имаме. Не е ова блеф. Граѓаните на Русија мора да знаат дека територијата на нашата земја ќе биде заштитена со сѐ што имаме. Запаметете западни партнери, ветрот може да се сврти и кон вас“, порача Путин.
Што се однесува до референдумите, Путин ги поддржа сепаратистите.
„Сестри и браќа наши во Донбас, Херсон и Запорожје, ќе направиме сѐ за да се одржат референдумите и луѓето ја изразат својата волја. Одлуката ќе ја донесат граѓаните на Лугањск, Донецк, Запорожје и Херсон. Мора да направиме сѐ за да ја заштитиме нашата татковина, луѓето во Русија и луѓето на ослободените територии“, смета тој.
Нагласи дека главна цел на Русија и понатаму е Донбас.
