Поранешниот капитен на „Романтичарите“ по трет пат ќе го облече црвениот дрес откако денеска стави потпис на договорот.
Тимот од скопско Дебар Маало се пофали дека се засилил со поранешниот репрезентативец Крсте Велкоски, кој изминативе 5 сезони настапуваше за босанскиот великан Сарајево, каде беше и капитен.
Велкоски потекнува од младинската академија на Работнички чиј дрес го носеше до есента 2008 година кога премина во Металург. Следуваа авантури во романски Чеахлаул и кипарски Еносис, за потоа од јануари 2011 до јануари 2014 повторно да го носи дресот на „Романтичарите“. Потоа замина во Сарајево каде по година и пол отиде на Далечниот Исток, прво во корејскиот Инчон, а потоа и во тајландскиот Суат Кат, за од летото 2017 повторно да заигра за тимот од босанската престолнина.
„Се чувствувам многу среќен, затоа што се вратив дома. Тоа е секогаш посебно чувство. Емоциите кон Работнички секогаш се максимални, верувам дека ќе му помогнам на тимот да ги оствари целите во претстојната сезона“, рече популарниот Крки, пренесе клубот преку својата официјална веб-страница.
Напаѓачот сега има 34 години и може да се каже дека направи паметен потег во враќањето во македонската лига, по една сезона каде иако капитен, не се изнаигра во Сарајево и често натпреварите ги почнуваше од клупата за резерви.
Со Работнички има освоено 2 домашни титули и тоа по еднаш 1.МФЛ и Купот, двете во сезоната 2007/2008.
За македонската репрезентација има 15 настапи без постигнат гол. Во ерата на селекторот Игор Ангеловски беше редовно повикуван, но најчесто беше резерва. Беше дел и од составот кој учествуваше на ЕУРО 2020, а по континенталниот собир се пензионираше од репрезентацијата.
