Фудбалскиот прволигаш од Дебар Маало зимава прави мал ремонт во тимот и откако ангажираше нов стратег сега ги претстави и првите засилувања.
Засега Работнички купува домашно бидеќи сите петорица доаѓаат од македонски клубови.
Вратени назад во клубот се 21-годишните офанзивци Марио Станковски од Борец и Андреј Лазаров од второлигашот Тиквеш. Вториот всушност се врати од позајмица. Станковски е син на новиот спортски директор на клубот, поранешниот фудбалер Горан Станковски, како и постар брат на Лука Станковски кој полусезонава брилјираше на зелениот терен.
Нови играчи на „Романтичарите“ се уште двајца играчи на велешки Борец и тоа левиот бек Марјан Ристовски и голманот Бурхан Мустафа. Ристовски полусезонава играше одлично и дури и се најде во тимот на полусезоната.
Последното засилување доаѓа од Силекс и се работи за 21-годишниот централен дефанзивец Андреј Кировски кој претходно настапуваше и за Саса, хрватски Сесвете, а потекнува од школата на Вардар.
Работнички веќе има нов стратег и тоа Александар Влахо кој повторно доби шанса откако управата пред Нова година се раздели со Србинот Ратко Достаниќ. Влахо го водеше тимот на почетокот од ланската сезона, но неговиот ангажман тогаш прекина по само 10 натпревари поради слаби резултати.
