Речиси осум милиони луѓе во Велика Британија се мачат да ги платат сметките додека растат трошоците за живот, пренесе BBC.
Управата за финансиско работење процени дека 7.8 милиони лица сега сметките ги гледаат како „тежок товар“, во споредба со 5.3 милиони во 2020 година. Цените на енергенсите, храната и горивото остро се зголемија изминатите шест месеци, делумно поради војната во Украина.
Инфлацијата, стапката со која растат цените, се зголеми на 10,1 отсто минатиот месец, наведе BBC. Граѓаните во Велика Британија купуваат помалку отколку пред пандемијата со коронавирус.
Обемот на продажба на мало падна повеќе од очекуваното од 1,4 проценти минатиот месец, продолжувајќи го падот од август.
– Потрошувачите сега купуваат помалку отколку пред пандемијата, изјави Дарен Морган од Канцеларијата за национална статистика.
Како што изјави Морган, трговците на мало појасниле дека падот во септември делмно се должи и на затворените продавници поради погребот на кралицата, но влијаеле и ценовните притисоци, што ги тераат потрошувачите да бидат внимателни при трошењето пари.
Морган додаде дека забележан е пад во сите видови продавници, а најостар има кај оние за храна.
