Објавен е првиот трилер за новата серија Dead Ringers со Рејчел Вајс - модерна верзија на истоимениот култен филмски класик филм на Дејвид Кроненберг од 80-тите со Џереми Ајронс во главните улоги.
Во новата, „женска“ верзија Вајс ги игра двете главни улоги на Елиот и Беверли Ментл.
Двете близначки и докторки гинеколози делат сè: дрога, љубовници и желбата да се направи сè што е потребно - вклучително и поместување на границите на медицинската етика - во обид да ги предизвикаат застарените практики и да ја доведат грижата за здравјето на жените во прв план.
Вајс е и извршна продуцентка на лимитираната серија, за која креаторка, сценаристка и извршна продуцентка е писателката и драматург Алис Бирч (Normal People, Succession).
Актерската екипа на серијата вклучува Бритн Олдфорд како Женевјев, Попи Лиу како Грета, Мајкл Чернус како Том, Џенифер Еле како Ребека и Емили Мид како Сузан.
Шон Дуркин ги режираше првите две епизоди и е ко-режисер на последната епизода од серијата. Дуркин служи и како извршен продуцент. Во режисерскиот тим се и Карин Кусама, Карена Еванс и Лорен Волкстин.
Dead Ringers е копродукција на Amazon Studios и Annapurna Television.
Сите шест епизоди од Dead Ringers премиерно ќе бидат прикажани на 21 април исклучиво на Prime Video во повеќе од 240 земји и територии ширум светот.