Реномираниот медиум употреби слика од пејнтбол во статија каде известува како Украина одбила руски напад.
Новинската агенција Reuters стана предмет на онлајн потсмев откако објави извештај за војната во Украина и притоа употреби слика на која се гледа како луѓе се забавуваат играјќи пејнтбол.
Веста која беше објавена во понеделникот известуваше како украинските војници одбиле руски напад во регионот Суми со наслов „Ukraine says it has repelled Russian incursion in Sumy region“ (Украина вели дека одбила руско навлегување во регионот Суми).
Објавата споделена и на социјалните мрежи привлече големо внимание не поради содржината на веста, туку поради сликата која беше употребена како насловна (веќе е тргната од страницата, но стои на објавите). Сликата, која веројатно требало да ги претстави украинските војници како се борат на фронтот, ако ја загледате убаво ќе приметите дека всушност е од луѓе кои играат пејнтбол, а носат и типична пејнтбол опрема со препознатливите маски и оружје со боја.
Оваа грешка на Reuters само ја подгреа лавината реакции на социјалните медиуми за вистинитоста во известувањата на западните медиуми за руската воена инвазија во Украина. „Овде Reuters ви вели дека Украинците одбиле руски напада КОРИСТЕЈЌИ ПЕЈНТБОЛ ПУШКИ. Абе ајде. Украинците ги бива, а не до толку“, вели еден твитерџија.
„Дали Америка потроши 40 милијарди долари за да ѝ купи на Украина пејнтбол опрема???“, прашува друг твитерџија.
„Веројатно на Украинците навистина им се потребни тие 40 милијарди долари ако навистина се борат против руската армија со пејнтбол пушки? А Reuters се чуди зошто веќе никој не им верува на медиумите“, напиша друг.
Reuters потоа се обиде да ја поправи грешката објавувајќи дека фотографијата покажува „членови на одбранбените сили“ како учествуваат на „тренинг симулација“. Сепак, она што читателите ѝ замеруваат на познатата агенција е што доколку сликата навистина претставува тренинг со пејтбол тоа не го ставила во објаснувањето кога првично ја објави веста.