Бразилскиот суд направи преседан и го осуди поранешниот репрезентативец Робињо на 9години затвор иако делото го изврши во Италија, а тој стана првиот човек во историјата на Бразил кој отиде во затвор поради осуда во друга земја.
Фудбалерот кој дури 100 пати го носеше дресот на Бразил е осуден на 9 години затвор во Италија во 2022 година, бидејќи на 22 јануари 2013 година, заедно со неговиот пријател Рикардо Фалко и уште четири лица силувале Албанка, жена која го прославувала својот 23. роденден во ноќниот клуб Sio Cafè во Милано.
Пред изрекувањето на пресудата, Робињо побегна во Бразил за да избегне казна бидејќи бразилските закони не дозволуваат екстрадиција на сопствените граѓани.
Италија минатата година побара од Бразил Робињо да ја отслужи казната во својата татковина, а вчера бразилскиот Висок суд на правдата (STJ) донесе одлука дека Робињо мора да биде уапсен и да ја отслужи казната во Бразил, со што ќе стане првиот осуденик кој ќе ја отслужи неговата казна во Бразил, а да е изречена во странство.
Девет од 11 судии гласаа за казната, наведувајќи како причина дека не сакаат да избие дипломатски скандал меѓу Бразил и Италија.
Адвокатот на Робињо, Жузе Едуарду Алкмин, најави жалба до Врховниот суд на Бразил и нагласи дека ќе побара да се повтори целото судење бидејќи смета дека Високиот суд на правдата со оваа одлука го нарушил суверенитетот на Бразил.
