Американка, која работи како здравствен работник во Флорида, првата доза на вакцината Moderna ја примила во јануари, во триесет и шестата недела од бременоста. Три недели подоцна, жената е породена и на свет родила женско бебе со антитела на COVID-19, тврдат двајца доктори.
Нејзиното дете е првиот регистриран случај во светот на бебе родено со антитела на коронавирусот по вакцинирање на мајката, пренесе Guardian.
Објавено е мислењето на двајцата педијатари кои дошле до ова сознание, а нивното тврдење допрва треба да биде потврдено.
Лекарите Пол Гилберт и Чед Радник велат дека мајката првата доза ја примила во јануари, во 36-тата недела од бременоста. Анализирајќи ја крвта од папочната врвца на бебето биле детектирани антитела, па докторите сметаат дека ова дава надеж за потенцијална заштита од инфекција со што би се намалил ризикот од SARS-CoV-2 преку вакцинација на мајката.
„Според нашите сознанија, ова е првиот извештај во светот за бебе родено со антитела по вакцинација“, вели Гилберт. „Ја тестиравме папочната врвца за да видиме дали антителата преминале од мајката на бебето, тоа е нешто што гледаме дека се случува за време на другите вакцинации во текот на бременоста“, додава тој.
