Новинарот експерт за трансфери, Фабрицио Романо, објави дека трансферот на Елиф Елмас во Лајпциг е 99% завршена работа.
Романо синоќа објави дека Лајпциг и Наполи се договориле за обештетување од 25 милиони евра, а сега информираше дека бундеслигашот и македонскиот репрезентативец ги договориле условите за договорот.
Останува уште да се испеглаат детали со Наполи и трансферот ќе се реализира.
„Ексклузивната приказна се очекува да заврши наскоро“, твитна Романо.
Неговиот договор со Наполи е до јуни 2025.
Елмас синоќа не беше дел од дебаклот на Наполи во Копа Италија, но не поради трансферот, туку поради тоа што има истегнат мускул и се очекува да се врати на терените на почетокот од јануари. За Лајпциг би можел да дебитира на 13-ти кога дома ќе го пречека Ајнтрахт во Бундеслигата.
Трансферот вреден 25 милиони евра значи дека Елмас ќе го урне рекордот за најскап трансфер на македонски фудбалер, кој е сам го држи. Кога во 2019 година од Фенербахче дојде во Наполи за него беше платена сума од 16,2 милиони евра.
Топ 5 најскапи трансфери на македонски фудбалери:
- Елиф Елмас од Наполи во Лајпциг - 25 милиони евра
- Елиф Елмас од Фенербахче во Наполи - 16,2 милиони евра
- Дарко Панчев од Црвена звезда во Интер - 12 милиони евра
- Горан Пандев од Интер во Лацио - 8 милиони евра
- Горан Пандев од Интер во Наполи - 7,5 милиони евра