Кристијано Роналдо ги посети своите поранешни соиграчи од Реал Мадрид во Ријад, Саудиска Арабија, пред финалето на шпанскиот Суперкуп против Барселона.
Славниот Португалец неодамна стана член на саудискиот Ал Наср од Ријад, а токму во тој град во недела ќе се одигра финалето на шпанскиот Суперкуп помеѓу Реал и Барселона.
Роналдо има убави спомени од Реал каде играше од 2009 до 2018 година.
„Секогаш е убаво да се видат поранешни соиграчи и луѓе од клубот во кој испишавме историја. Беше прекрасно да се видам пријатели и да ги прегрнам сите. Среќно на нашиот Реал Мадрид в недела“, порача Роналдо во видеопораката до навивачите објавена на мрежите на „Кралскиот клуб“.
Шпанскиот Суперкуп се одржува во Саудиска Арабија. Во полуфиналето Реал беше подобар од Валенсија, а Барселона од Бетис. Финалето ќе се игра во недела во 20:00 часот по средноевропско време.