Манчестер Јунајтед соопшти дека ќе го раскине договорот со Кристијано Роналдо.
Ова е очекуван епилог од долготрајната расправија меѓу еден од најдобрите напаѓачи во историјата и еден од најтрофејните клубови во Англија и светот. Веќе се шпекулираше дека Роналдо го одигра последниот натпревар за Јунајтед.
„Кристијано Роналдо го напушта Манчестер Јунајтед со взаемна согласност и одлуката стапува на сила веднаш. Клубот сака да му се заблагодари за огромниот придонес во двете периоди на ‘Олд Трафорд’, постигнувајќи 145 гола на 346 натпревари, и му посакува добро нему и на неговото семејство во иднина. Сите во Манчестер Јунајтед остануваат фокусирани на продолжување на напредокот на тимот под водство на Ерик тен Хаг и на соработка за постигнување успех на теренот“, се вели во соопштението.
Претходно беа отстранети неговите фотографии од стадионот
Клубот ангажираше работници минатата недела да ги отстранат огромните плакати на Кристијано Роналдо од предниот дел на „Олд Трафорд“, откако Португалецот се нафрли на клубот во кој се врати минатата година во интервју за Пирс Морган.
„Манчестер Јунајтед ме изневери, од мене направија црна овца. Немам почит кон Ерик тен Хаг бидејќи ниту тој нема почит кон мене. Луѓето мора да ја знаат вистината. Јунајтед сакаше да ме брка. Не само тренерот туку и луѓето околу клубот. Се чувствував предаден. Некои луѓе не ме сакаа во Манчестер Јунајтед, не само оваа сезона туку и минатата“, изјави Роналдо и продолжи:
„Напредок откако дојдов не постои. Откако си замина сер Алекс, клубот воопшто не еволуираше. Ништо не се промени. Навивачите треба да ја знаат вистината. Го сакам најдоброто за клубот и затоа дојдов. Но некои работи во клубот не му помагаат да дојде до нивото на кое се Сити, Ливерпул и сега Арсенал. Ваков клуб треба да биде на врвот, а во моментов не е“.
Јунајтед игра подобро без Роналдо
Едноставна статистика извлечена од британскиот Sky Sports покажува колку е полош Манчестер Јунајтед во Премиер лигата кога Роналдо игра од првата минута. Во просек Јунајтед со Роналдо добива само еден од четири натпревари и освојува еден бод. Кога Португалецот не игра од првата минута, Јунајтед добива 70 проценти од своите натпревари и во просек освојува 2,2 поени по натпревар.
Исто така, голема разлика може да се забележи во поминатите километри. Тимот на Ерик тен Хаг со Роналдо во првиот тим истрча 4,5 километри помалку отколку кога Португалецот не игра или доаѓа од клупата. Одлуката за раскин на договорот затоа веројатно ќе наиде на одобрување кај дел од навивачите.
