Португалскиот фудбалер Кристијано Роналдо (37) денеска одработи фитнес тренинг во Мадрид во тренинг кампот на Реал, соопшти шпанскиот клуб.
Роналдо минува неколку дена во шпанската престолнина, па од претседателот на Реал, Флорентино Перес побарал дозвола да ги користи клупскиот тренинг центар и објектите.
Петкратниот освојувач на Златната топка во придружба на својот најстар син одработи кондиционен тренинг, без да го попречи тековниот тренинг на првиот тим на Реал.
Перес му рекол на Роналдо дека може да ги користи објектите на Реал колку сака, но според шпанските медиуми, се отфрла какво било враќање на Португалецот во Реал.
Португалија на Роналдо неодамна беше елиминирана во четвртфиналето на Светското првенство во Катар по поразот од Мароко.
Португалецот моментално е без клуб откако го напушти Манчестер Јунајтед на 22 ноември.
Англискиот клуб и Роналдо потоа по меѓусебен договор на двете страни ја прекинаа соработката.
