Роверите кои ја истражуваат површината на Марс во последно време пронајдоа интересни и чудни формации. Иако не станува збор за предмети останати од древни вонземски цивилизации, туку за природни феномени или наши „отпечатоци“, сепак тоа не значи дека овие откритија не се интересни.
Се чини дека Црвената планета и понатаму крие многу тајни, па прашање е на што сè ќе наидат вселенските агенции во текот на истражувањата.
Роверот Perseverance на НАСА пронајде чуден заплеткан предмет на Марс кој изгледа како замрсен рибарски конец. И покрај тоа што многумина се понадеваа дека можеби станува збор за нешто што потекнува од вонземска цивилизација или мистериозен природен феномен, најверојатното објаснување за оваа глетка сме ние самите.
Експертите сметаат дека се работи за мало парче смет, односно остаток од падобран или некој друг механизам со чија помош роверот се спушти на површината на Марс во 2021 година.
Веројатно ветерот ја оддувал оваа заплеткана жица понатаму по површината, близу роверот. По само неколку дена, истиот објект не е регистриран во близина на роверот, пишува Universe Today.
Можеби ќе се запрашате зошто воопшто некој пишува за човечко ѓубре на Марс, односно зошто би станувало збор за некое интересно откритие. Многу е интересно да се види како освен на Земјата, луѓето почнаа да оставаат „траги“ и на другите планети.
Експертот за обработка на фотографии Стујарт Аткинсон смета дека таквите работи не треба да не загрижуваат.
„За стотина година Марсовците ќе ги собираат сите тие работи и можеби ќе ги изложат во музеј или од нив ќе прават „историски накит“, како што тоа го правиме на Земјата со фосилите и метеоритите“, напиша Аткисон на Twitter.
Заплетканата жица не е единственото откритие на Марс во последните неколку месеци. Роверот Curiosity сними чудни формации при што едната личеше на врата.
Беа забележани и потреси на Марс, но и други интересни феномени кои предизвикаа интерес во јавноста.